Diva Devil Ham

      Chanel係我其中一個買唔起，唔啱著，但又好鍾意嘅一個牌子。同“舒西多”Shiseido一樣，Chanel都好鍾意用山茶花，不過chanel就鍾意用黑白2色，而“舒西多”就鍾意用紅白2色。同樣喜愛嘅兩個牌子，我梗係唔會大細超，chanel一樣有花名“香妞”，我鍾意核核突突咁哎佢做“香妞”，夠晒“娘”，夠晒“扑”。千奇唔好話我變態啊。今期，我地主要講嘅唔係正牌Chanel又幾經典，Coco姐有幾前衛，而係講老翻chanel有幾新奇，有幾過癮。

DISSIZIT今年夏季新款Channel No.0 Tee大玩Chanel No.5,死晒字咁。Channel仲要加埋TM商標，認真抵死。

前排海港城展出嘅新加坡藝術家Paul Koh嘅“貓夢成真”畫展中，都可以見到來自Chanel No.5嘅創作靈感。

    上網見到嚟隻1977年嘅古董碟，碟名就叫Shit & Chanel No.5。至于隻碟好冇聽，邊個唱我完全唔知，唯一可以引起我共鳴嘅就係佢嘅碟名，不禁令我回想起Chanel No.Shit嘅電影爛gag。

今月14號法國名牌溶解王Zevs嚟到香港搞展覽都不忘要Kuso下Chanel，居然係中環Armani旗艦店門口外場溶解Chanel，最后當然係畀差人哥哥塔咗翻去飲咖啡啦。畀佢咁搞法，chanel唔知好笑定好喊，仲要揀喺Armani門口搞，明剃Armani眼眉，外牆烏糟咗唔在講，仲要幫對手賣埋廣告，我諗Armani就算唔喊都一定笑唔出。不過可以肯定嘅係喊得最大聲嘅一定係負責清洗外牆善后嘅工作人員啦。（上圖左為Armani外牆半成傚果，上圖右為年前溶解Chanel完成圖。）

上圖為07年法國搞怪設計師Naco－paris設計嘅Chanel Fake Tee，套用現今用語，真係山寨得很。

     喺google搵搞怪假Chanel傑作嘅時候，居然畀我見到好多Chanel造型嘅蛋糕，真係個個都可以亦假亂真，異常過癮，真係慾罷不能，一路搜，一路搜。上面嘅圖蛋糕就係我搜到最靚嘅幾個啦。Chanel嘅2.55同Hermes嘅kelly袋化身Cup Cake紙杯蛋糕仔，手工非常精細，好鬼得意啊。而好幾個Chanel bag Cake都做得好真，特別係左下角個個，仲特別花心思加多個Chanel嘅Price Tag落去，更加形神俱在。除左名牌袋之外，仲有Chanel 化妝品造型嘅Cup Cake。望到細細支嘅唇膏，唇彩仔，靚到都唔捨得食啊。

    不過上面嘅蛋糕全部都係訂做嘅，價錢非常喇脷，就以中間嘅粉紅色Chanel Bag Cake為例，單個已經叫價288美金。一嚟貴，2嚟睇到都試唔到，好多都係美國加拿大嘅網上餅屋訂做嘅，所以話飽下眼福就好啦，要飽口福講緣分啦。可能你都有疑問，chanel幾時涉獵埋做蛋糕咖？你冇搞錯，上面d蛋糕確實唔關Chanel事，話明主題係老翻Chanel，d蛋糕都係私人訂做嘅，至于d餅屋有冇畀版權費chanel，咁我就不得而知拉。

    自從去完Tiffany之後，我就好似上身咁，不斷咁上網睇唔同牌子嘅Bridal Collection，而我今日要講嘅David Yurman亦都係其中一個。如果你係要追求經典溫馨Touching Feel嘅，Sorry！David Yurman唔啱你。嚟個美國珠寶品牌係以型格路綫著稱，如果你自認係一個離經叛道嘅烈女，唔鍾意人有我有嘅永恆定律嘅話，David Yurman可能好fit你。

      David Yurman經典platinum 電纜交叉造型單粒鑽戒將野性嘅感覺表露無遺，喺閃閃令之餘仲帶出型格味道。而另外2隻全鑽platinum婚戒指就啱d唔想太野性，但又想有d型底嘅朋友啦。戒指內籠采取Cable設計，巧妙咁將野性收收埋埋，盡量低調嘅野性絕對可以滿足你唔想太傳統，但又唔想太悶嘅要求。

      我今次專登開篇講David Yurman唔係想講佢有幾勁，有幾貴，而係佢嘅每季廣告都好打動到我。盡管每季來來去去都係黑白色調，大賣超級名模close up大頭相，但係每次都都交足有戲眼神。眼神曉說話真係唔講得笑，殺傷力無窮，唔信？有相為證啊，馬上去片。

     雖然最新嘅Campaign仲未出爐，上面嘅只係近幾年拍落嘅，但係有齊Kate Moss，Daria，Natalie同埋杜娟，我一樣咁愛。 

      9號風球剛過境，本來仲擔心香港之旅未能如期進行嘅老糖同黃生卒之順利到步。一如既往，我地第一站就去咗行老糖一定發到市嘅細it。行咗一圈都唔見老糖有咩斬獲，本來以為佢冇睇啱咩，但原來佢係謀定而制動，一早就睇啱咗tout'a coup嘅一條連身橙色間條“監躉裙”，撞鬼囉～～～～400幾蚊買條“監躉裙”，150都畀多啦，我梗係唔畀佢買咖。

     唔知係咪佢近期新奇士上身，喺Pou Dou Dou又睇啱一條橙色裙，但係係我勸說之后，轉攻另一條同款嘅藍綠色連身裙，為咗幫嚟條裙尋找合適嘅外套仔，我地一圈一圈咁兜。突然發覺唔知係咪因為金融海嘯炒錯人，炒剩咗堆好唔掂嘅designer。見到一件件“娘”爆阿婆花花裙，盪喲～盪喲嘅核突蛋糕背心，我都忍唔住講句：“嘩！咩世道啊。”“世界變囉。”“前世囉”。凡見到一件，我就會好似老闆咁同老糖講：“炒，嚟個應該炒，嗰個即刻炒！”哈哈哈哈哈，簡直就係扮晒魚蝦蟹咁。卒之，揀唔啱外套仔，但係都畀我哋搵到件靚靚X-girl紅色女裝格仔shirt，咁就完成咗又一城it之旅。之后行多陣，我哋就直奔尖嘴啦。

     去到新港中心，我哋居然喺翻Pou Dou Dou搵到一件可以襯到條裙裙嘅外套，真係衆裡尋他啊...........喺今次it之旅我哋除咗見識咗好多核突衫之外，都知道咗原來it入貨好多時都入1個碼，然后標明係free size，真係少d緣分都買冇唔到衫啊～～得一個碼嘅話。

    成日嘅重頭戲嚟啦，老糖同黃生要去睇wedding rings啊～～雖然只係初步睇下嗟，不過已經係前進一大步咖啦～其實之前佢哋已經係廣州嘅周大包睇咗，不過老糖話佢嘅女裝戒指太粗啦，想買幼d。咁就梗係咖啦～～有名你叫周大碌，賣d嘢就梗係大碌d咖啦～～～老糖今次就喺一心嚟睇下Tiffany嘅戒指，你話幾富貴啊。

    沿住廣東道，嚟到新開幕嘅1881 Heritage，裡面嘅Montblanc，Cartier，Piaget，Van Cleef & Arpels,Tiffany & Co.一字排開，每間店都有最少2層，異常壯觀。Montblanc仲裝修緊，其它3間太宏偉，我哋唔敢入，維有直赴Tiffany。玻璃結搆式外牆嘅Tiffany，少咗份奢華感，多咗份現代感，亦都多咗份親切感。今次係我第一次行Tiffany，一行入去見到咁多閃令令嘅珠寶，真係有d緊張。

     一樓嘅Tiffany係主要賣Fine Jewellery嘅，gold，white gold，platinum等等貴金屬質材嘅就喺一樓。而負一層則係賣Fashion Jewllery，嗟係銀之類首飾，當然價錢親民好多，樓上2萬under都係超級碎料，而樓下4千under都可以有好多選擇。不過由于我戴銀d銀會氧化，幾靚都冇福消受。至于老糖佢地睇啱咩戒指，我就梗係唔可以隨便透露啦，不過我可以話畀大家知嘅係佢哋睇嘅絕對係1樓靚貨。姑勿論你買嚟送禮定自用，只要你戴得銀，嚟隻純銀鑽石絕對買得過。4粒企定嘅鑽石，合共0.06卡拉。嚟個sumerset系列戒指係Tiffany新款戒指，大方得體之餘，售價只係HKD 3500，但係睇落絕對似賣9000幾up，所以絕對買得過。

     而我自己就比較鍾意下面嚟隻合共0.11卡，6mm闊Lucida系列嘅platinum戒指。不過售價2萬以上，唔知到幾時先會有心又有力咁買到佢翻嚟。

     曾幾何時，一齣Breakfast at Tiffany牽動無數女人嘅心，令到佢哋聞T色變，一個個對Tiffani到達神往嘅境界。雖然我都睇過嚟齣Audrey嘅名片，但一路都不能理解女人們為何如此癡迷，直到不過今次Tiffany之旅，我先明白到Tiffani嘅威力何在。微暗嘅室內更加襯託出射燈下珠寶嘅閃燿光芒，非常之能夠營造氣氛，尤其夜晚嘅時候，外面漆黑一片，而室內個種柔和嘅暖暖光芒，確實可以畀人一種幸福嘅感覺。而戒指嘅設計亦都非常貼心，除咗設計感十足之外，造工都好精細，肯花心思將指環切割幼細，更加可以襯託出女士手指嘅細嫩纖長。喺Tiffani行出嚟嘅一刻我都不禁幻想自己某一日都可以喺Tiffany睇足一日，買足一日。

    下面嚟隻就係Tiffany最經典嘅求婚戒指The Tiffany setting，俗稱6爪鑽戒。備有0.02卡到2.5卡，丰儉由人。

     我哋3人喺Tiffany混完吉出嚟，就去咗對面海港城嘅Montblanc繼續睇戒指。聽老糖講，我先知原來Plantium先係真正嘅鉑金，係天然固有的稀有金屬，而white gold係合金白金，畀platinum市值同保值度都要低，但由于我深受敗犬女王嘅荼毒，我已經深深愛上咗Montblanc嘅signature 4810系列6角星white gold戒指啦，成隻戒指嘅造型就係以萬寶龍6角星標誌嚟設計嘅。下面嚟隻就係盧卡斯喺18集嘅時候準備向無雙求婚嘅6角星6鑽white gold戒指，合共0.13卡拉。

     下面嚟隻就係大結局盧卡斯再次想向無雙求婚嘅6角星2.02卡全鑽戒指。就好似小天講，佢做咗醫生有錢買靚鑽戒畀無雙啦。睇下幾閃，肯定羨慕死隔離啦。

     自從敗犬爆紅，允浩學長都跟住爆紅，當然我都buy學長嘅深情同迷人嘅笑容啦。而個隻跟住學長6年嘅求婚戒指據聞已經成為趕上Tiffany，成為萬衆女性得獲幸福嘅象徴物。嚟隻Montblanc嘅La Dame Blanche系列6角寶鑽platinum求婚戒。單粒鑽石由0.18－1.99卡不等，豐儉由人，令大家都有追求幸福嘅均等機會。

    自己好幾鍾意嚟只6角星戒指，雖然好似螺母。哈哈哈～～不過唔知我戴咗係咩樣呢？